*பயண துஆ – அல்லாஹ்வின் மீதான முழுமையான நம்பிக்கை*
பயணம் என்பது மனித வாழ்வின் ஒரு அங்கமாகும். நாம் பயணம் செய்யும்போது பயன்படுத்தும் வாகனங்கள்முற்காலத்தில் ஒட்டகங்கள், கப்பல்கள், இன்று டுவீலர்கள் கார்கள், ரயில்கள், விமானங்கள் யாவும் *அல்லாஹ்வின் மாபெரும் அருட்கொடைகளாகும்*.
இதைத்தான் அல்லாஹ் தனது திருமறையில் (43:12-14) மூலம் நினைவூட்டுகிறான்.
இந்த வசனங்கள், இந்த வலிமையான வாகனங்களை அடக்கி ஆளும் சக்தி நமக்கு இல்லை என்பதை முதலில் உணர வைக்கிறது. *நாங்கள் இதற்குச் சக்தியற்றவர்களாக இருந்த நிலையில் எங்களுக்கு இதை வசப்படுத்தியவன் தூயவன்* என்ற வார்த்தைகள், *நமது பலவீனத்தையும் அல்லாஹ்வின் பேராற்றலையும்* ஒரே நேரத்தில் வெளிப்படுத்துகின்றன.
நாம் ஒரு வாகனத்தில் ஏறி அமரும்போது, கர்வத்தை விட்டுவிட்டு, *இந்த வசதியை நமக்குத் தந்த இறைவனுக்கு நன்றி செலுத்த வேண்டும்*.
மேலும், ஒவ்வொரு பயணமும் *நமது இறுதிப் பயணமான மரணத்தையும், அல்லாஹ்விடம் மீள்வதையும்* நினைவூட்ட வேண்டும் என்பதற்காகவே, *நாங்கள் எங்கள் இறைவனிடமே மீண்டு செல்லக்கூடியவர்கள்* என்று கூறுமாறு நமக்கு கட்டளை இடுகிறான்.
இப்னு உமர் (ரலி) அவர்கள் அறிவிக்கும் ஹதீஸ், இந்த குர்ஆன் வசனங்களை நபிகளார் தங்கள் வாழ்வில் எப்படிச் செயல்படுத்தினார்கள் என்பதைக் காட்டுகிறது.
நபிகளார் வாகனத்தில் ஏறியதும், மூன்று முறை *அல்லாஹு அக்பர்* (அல்லாஹ் மிகப் பெரியவன்) என்று கூறி, அல்லாஹ்வின் மகத்துவத்தை முதலில் நிலைநிறுத்துவார்கள்.
பிறகு, குர்ஆன் நமக்குக் கற்றுத்தந்த அந்த நன்றியின் வார்த்தைகளைக் கூறுவார்கள்.
பயணம் தீய நோக்கங்களுக்காக அல்லாமல், *நன்மை* மற்றும் *இறையச்சம்* நிறைந்ததாக இருக்க வேண்டும் என்று அவர்கள் பிரார்த்தனை செய்வார்கள்.
இந்த துஆவின் மிக அழகான பகுதி இதுதான்.
பயணிக்கும்போது ஒரு மனிதனுக்கு இரண்டு கவலைகள் இருக்கும், ஒன்று, *பயணத்தில் தனக்கு ஏற்படக்கூடிய ஆபத்துகள்*, மற்றொன்று, *வீட்டில் விட்டுச் செல்லும் குடும்பத்தின் பாதுகாப்பு*.
நபி (ஸல்) அவர்கள், *இறைவா, நீயே என் பயணத் தோழன் , நீயே என் குடும்பத்தின் பிரதிநிதி* என்று கூறி, இரண்டு பொறுப்புகளையும் அல்லாஹ்விடமே ஒப்படைக்கிறார்கள்.
பயணத்தின் களைப்பு, துயரமான காட்சிகள், அல்லது பயணம் முடிந்து திரும்பும்போது தன் குடும்பத்திலோ பொருளிலோ தீய மாற்றங்களைக் காண்பது போன்ற அனைத்திலிருந்தும் அவர்கள் அல்லாஹ்விடம் பாதுகாப்புத் தேடினார்கள்.
பயணம் முடிந்து திரும்பும்போதும்,* பாவ மன்னிப்புக் கோரியவர்களாக, இறைவனை வழிபட்டவர்களாகவே* அவர்கள் திரும்பினார்கள்.
இந்த ஹதீஸ் நமக்குக் கற்றுத் தருவது பாடம் என்பது, ஒரு முஸ்லிமின் பயணம் என்பது வெறும் இடப்பெயர்வு மட்டுமல்ல. அது *அல்லாஹ்வின் அருளை நினைவு கூர்வது, அவனிடம் முழுமையாகத் தஞ்சம் அடைவது, நன்மைக்காகப் பயணிப்பது, மற்றும் பாதுகாப்பிற்காக அவனையே சார்ந்திருப்பதாகும்.*
ஏகத்துவம்
About Author
