தீய பண்புகள்
இஸ்லாம் என்பது நற்குணங்களின் மார்க்கமாகும். ஒரு முஸ்லிமின் ஈமான் அவனது குணாதிசயங்கள் மூலம் வெளிப்படுகிறது.
தனிமனிதனையும் சமூகத்தையும் சீரழிக்கும் தீய குணங்களை இஸ்லாம் வன்மையாகக் கண்டிக்கிறது.
குர்ஆன் மற்றும் ஹதீஸின் ஒளியில் அத்தகைய சில தீய குணங்களைப் பற்றிய சுருக்கமான காண்போம்
மனிதனை சுவர்க்கத்திற்கோ அல்லது நரகத்திற்கோ இழுத்துச் செல்வதில் நாவிற்குப் பெரும் பங்குண்டு.
கேள்விப்பட்டதையெல்லாம் பரப்புதல்
இது வதந்திகளுக்கும், குழப்பங்களுக்கும் மூல காரணமாக அமைகிறது. நபி (ஸல்) அவர்கள், “ஒருவர் தாம் கேள்விப்பட்டதையெல்லாம் பரப்புவதே அவர் பொய்யர் என்பதற்குப் போதுமான சான்றாகும்” என்று எச்சரித்துள்ளார்கள் (ஆதாரம்: முஸ்லிம்).
வதந்தி பரப்புதல்
வதந்திகளைப் பரப்புவது சமூக அமைதியைக் குலைக்கும் செயல்.
“நம்பிக்கை கொண்டவர்களே! தீயவன் ஒருவன் உங்களிடம் ஒரு செய்தியைக் கொண்டு வந்தால், (அதன் உண்மைத்தன்மையை) நீங்கள் ஆராய்ந்து பாருங்கள்” (49:6) என்று கட்டளையிடுகிறது.
பொய்
நயவஞ்சகத்தின் மூன்று அடையாளங்களில் ஒன்றாக நபி (ஸல்) அவர்களால் குறிப்பிடப்பட்டுள்ளது (ஆதாரம்: புகாரி).
“பொய்யர்களின் மீது அல்லாஹ்வின் சாபம் உண்டாகட்டும்” (3:61) என்று கடுமையாக எச்சரிக்கிறது.
புறம் பேசுதல்
குர்ஆன் இதை, “உங்களில் ஒருவர் தனது இறந்த சகோதரனின் மாமிசத்தை உண்ண விரும்புவாரா?” (49:12) என்று கேட்டு, இதன் கொடூரத்தை உணர்த்துகிறது.
தூற்றல் / கேலி செய்தல்
பிறரை இழிவாகப் பேசுவதும், அவர்களின் குறைகளைக் கூறி கேலி செய்வதும் இஸ்லாத்தில் தடை செய்யப்பட்டுள்ளது. “நம்பிக்கையாளர்களே! ஒரு கூட்டத்தினர் மற்றொரு கூட்டத்தினரைக் கேலி செய்ய வேண்டாம்” (49:11) என குர்ஆன் தடுக்கிறது.
பயனற்று பேசுதல்
தேவையற்ற, வீணான பேச்சுகளைத் தவிர்ப்பது ஈமானின் அழகு. “பயனற்ற பேச்சுகளை அவர்கள் செவியுற்றால், அதிலிருந்து விலகிச் செல்கின்றனர்” (28:55) என்று குர்ஆன் நம்பிக்கையாளர்களின் பண்பாகக் கூறுகிறது.
அகந்தை மற்றும் தற்பெருமை
“பெருமை” என்பது உண்மையை மறுப்பதும், மக்களை இழிவாகக் கருதுவதும் ஆகும். நபி (ஸல்) அவர்கள், “யாருடைய உள்ளத்தில் அணுவளவு பெருமை இருக்கிறதோ, அவர் சுவர்க்கம் நுழைய மாட்டார்” (ஆதாரம்: முஸ்லிம்) என்று கூறியுள்ளார்கள். தற்பெருமை கொள்வதை குர்ஆன், “உங்களையே நீங்கள் பரிசுத்தவான்கள் என்று கூறிக்கொள்ளாதீர்கள்” (53:32) என்று தடுக்கிறது.
கெட்ட எண்ணம்
பிறரைப் பற்றி ஆதாரமின்றி தவறாகச் சந்தேகிப்பது. குர்ஆன், “நம்பிக்கையாளர்களே! பெரும்பாலான சந்தேகங்களிலிருந்து விலகிக் கொள்ளுங்கள். ஏனெனில், சந்தேகங்களில் சில பாவமாகும்” (49:12) என்று எச்சரிக்கிறது.
முகஸ்துதி
நற்செயல்களை அல்லாஹ்விற்காகச் செய்யாமல், மக்களின் பாராட்டுக்காகச் செய்வது ‘முகஸ்துதி’ எனப்படும். நபி (ஸல்) அவர்கள் இதை “மறைவான இணைவைப்பு” என்று அழைத்தார்கள் (ஆதாரம்: அஹ்மத்). இது நற்செயல்களின் பலனை அழித்துவிடும்.
கோபம்
உண்மையான வீரன் மல்யுத்தத்தில் வெல்பவன் அல்ல; மாறாக, கோபத்தின் போது தன்னைக் கட்டுப்படுத்திக் கொள்பவனே உண்மையான வீரன் என்று நபி (ஸல்) அவர்கள் கூறினார்கள் (ஆதாரம்: புகாரி).
பேராசை
போதுமென்ற மனமின்மை மற்றும் உலக ஆஸ்தியின் மீதான அதீத பற்று, மனிதனை ஹராமான வழிகளில் செல்லத் தூண்டுகிறது.
கஞ்சத்தனம்
அல்லாஹ் வழங்கிய செல்வத்திலிருந்து அவனது வழியில் செலவு செய்யாமல் தடுத்து வைப்பது. குர்ஆன், “கஞ்சத்தனம் செய்பவர்களையும், கஞ்சத்தனம் செய்யும்படி பிறரைத் தூண்டுபவர்களையும் அல்லாஹ் நேசிப்பதில்லை” (4:37) என்கிறது.
வாக்கு மீறல்
இதுவும் நயவஞ்சகத்தின் அடையாளங்களில் ஒன்றாகும் (ஆதாரம்: புகாரி). “வாக்குறுதிகளை நிறைவேற்றுங்கள்; நிச்சயமாக வாக்குறுதி (குறித்து) நீங்கள் விசாரிக்கப்படுவீர்கள்” (17:34) என குர்ஆன் வலியுறுத்துகிறது.
இந்தத் தீய குணங்கள் ஒரு முஸ்லிமின் ஈமானைப் பாழ்படுத்தி, மறுமை வாழ்வை வீணாக்கிவிடும்
இவற்றைக் கண்டறிந்து, விலகி, உள்ளத்தைத் தூய்மைப்படுத்திக் கொள்வது ஒவ்வொரு முஸ்லிமின் மீதும் கட்டாயக் கடமையாகும்.
About Author
