தொழுகையின் நிறைவில் கேட்க வேண்டிய நான்கு மகத்தான பாதுகாப்புகள்
நமது வாழ்வில் தொழுகை என்பது அல்லாஹ்வுக்கும் அடியானுக்கும் இடையிலான மிக நெருக்கமான தொடர்பாகும்.
தொழுகையின் ஒவ்வொரு அசைவும், ஒவ்வொரு வார்த்தையும் ஆழமான அர்த்தங்களைக் கொண்டது. அதிலும் குறிப்பாக, *தொழுகையை நிறைவு செய்யும் தருணம் (அத்தஹிய்யாத் அமர்வு) பிரார்த்தனைகள் மிக முக்கியமான ஒன்றாகும்.
இந்தத் தருணத்தில், நம்மைச் சூழ்ந்துள்ள மாபெரும் நான்கு ஆபத்துகளிலிருந்து பாதுகாப்பு தேடுமாறு நபிகளார் நமக்குக் கற்றுத்தந்துள்ளார்கள்.
அபூஹுரைரா (ரலி) அவர்கள் அறிவிக்கிறார்கள்:
அல்லாஹ்வின் தூதர் (ஸல்) அவர்கள் கூறினார்கள்: *உங்களில் ஒருவர் (தொழுகையில்) இருப்பின், அவர் நான்கு விஷயங்களிலிருந்து அல்லாஹ்விடம் பாதுகாப்புக் கோருங்கள்.* அவை:
*இறைவா! நான் உன்னிடம் நரகத்தின் வேதனையிலிருந்தும், கப்ரின் வேதனையிலிருந்தும், வாழ்வு மற்றும் இறப்பின் சோதனையிலிருந்தும், தஜ்ஜாலால் ஏற்படும் குழப்பத்தின் தீங்கிலிருந்தும் பாதுகாப்பு தேடுகிறேன்.*
(நூல்: முஸ்லிம் 924)
நான்கு பாதுகாப்புகளின் விளக்கம் பின்வருமாறு
இந்தச் சிறிய துஆ, மனிதனின் இம்மை மற்றும் மறுமை வாழ்க்கையின் ஒட்டுமொத்த பாதுகாப்பையும் உள்ளடக்கியது. அந்த நான்கு விஷயங்களின் முக்கியத்துவத்தை பற்றி பார்ப்போம்.
\\*நரகத்தின் வேதனை* \\
மனிதர்களின் இறுதித் தோல்வி என்பது நரகத்தில் நுழைவதாகும். *அதன் நெருப்பும், வேதனையும் கற்பனை செய்து பார்க்க முடியாத அளவு கடுமையானது*.
ஒரு முஸ்லிம் தனது ஒவ்வொரு தொழுகையிலும் நரகத்திலிருந்து பாதுகாப்பு தேடும்போது, *அவன் பாவங்களிலிருந்து விலகி இருக்கவும், அல்லாஹ்வின் தண்டனையை அஞ்சவும்* அது நினைவூட்டுகிறது.
\\ *கப்ரின் வேதனை* \\
மனிதன் இறந்தவுடன் சந்திக்கும் முதல் இடம் ‘கப்ரு’ (மண்ணறை) ஆகும். இது மறுமை வாழ்வின் நுழைவாயில். *கப்ரு என்பது மறுமையின் தங்குமிடங்களில் முதல் தங்குமிடமாகும், இதில் ஒருவன் தப்பித்து விட்டால், இதற்குப் பின்னுள்ளவை அவனுக்கு மிகவும் லேசானதாகும்* இருளும் தனிமையும் சூழ்ந்த அந்த இடத்தில், அல்லாஹ்வின் பாதுகாப்பு மட்டுமே நமக்குத் துணையாக இருக்கும்.
\\ *வாழ்வு மற்றும் இறப்பின் சோதனை* \\
இது மனிதனின் ஒட்டுமொத்த வாழ்க்கைப் பயணத்தையும் குறிக்கிறது.
வாழ்வின் சோதனை என்பது நாம் உயிருடன் இருக்கும்போது சந்திக்கும் சோதனைகள். இதில் *வறுமை, நோய், செல்வம், மற்றும் இறைநம்பிக்கையை அசைக்கக்கூடிய உலக ஆசைகள்* ஆகியவை அடங்கும்.
இறப்பின் சோதனை என்பது இது மிகவும் ஆபத்தான கட்டம். *உயிர் பிரியும் தருவாயில் ஷைத்தான் மனிதனை வழிகெடுக்க முயற்சிப்பான்*.
மேலும், *கப்ரில் வானவர்கள் கேட்கும் கேள்விகளும் இதில் அடங்கும்*.
*இறைவா, என் இறுதி மூச்சு வரை ஈமானை உறுதியாக வைத்திரு* என்பதே இதன் சாராம்சம்.
\\ *தஜ்ஜாலின் குழப்பம்* \\
உலக முடிவு நாளுக்கு (கியாமத்) முன்பு ஏற்படவிருக்கும் சோதனைகளிலேயே மிகக் கடுமையானது *தஜ்ஜாலின் வருகையாகும்*.
ஆதம் (அலை) படைக்கப்பட்டது முதல் மறுமை நாள் வரை தஜ்ஜாலின் குழப்பத்தை விட பெரிய குழப்பம் ஏதுமில்லை என்று நபிமொழிகள் எச்சரிக்கின்றன.
அவன் அற்புதங்களை நிகழ்த்தி இறைநம்பிக்கையாளர்களை வழிகெடுப்பான். நாம் அந்த காலத்தில் வாழ்ந்தாலும் சரி, அல்லது அதற்கு முன் மரணித்தாலும் சரி, அவனது தீங்கிலிருந்து பாதுகாப்புத் தேடுவது அவசியமாகும்.
இந்தத் துஆவை நபிகளார் வலியுறுத்திக் கூறியதற்குக் காரணம், *ஒரு மனிதன் இந்த நான்கு விஷயங்களில் வெற்றி பெற்றுவிட்டால், அவனது இம்மை மற்றும் மறுமை வாழ்க்கை முழுமையடைந்துவிடும்*.
எனவே, நாம் தொழுகையில் அத்தஹிய்யாத் ஓதி முடித்த பின், ஸலாம் கொடுப்பதற்கு முன்னால் இந்த துஆவை ஓதுவதை ஒருக்காலும் தவறவிடக்கூடாது.
அல்லாஹ் நம் அனைவரையும் இந்த நான்கு சோதனைகளிலிருந்தும் பாதுகாத்து, நிலையான சுவனத்தை வழங்குவானாக. ஆமீன்.
ஏகத்துவம்
About Author
