இஸ்லாம் போற்றும் உன்னத நற்பண்புகள்
இஸ்லாம் என்பது வெறும் வணக்க வழிபாடுகளை மட்டும் கொண்ட மார்க்கம் அல்ல; அது ஒரு மனிதனை முழுமையான பண்பாளராக மாற்றும் வாழ்வியல் நெறியாகும். இஸ்லாமிய பார்வையில், ஒருவரின் இறைநம்பிக்கை முழுமை பெறுவது அவரது நற்குணங்கள் மூலமாகவே அறியப்படுகிறது.
குர்ஆன் மற்றும் ஹதீஸ் ஒளியில் இஸ்லாம் வலியுறுத்தும் முக்கிய ஒழுக்கங்களைப் பார்ப்போம்.
முன்மாதிரியான நற்குணம்
ஒரு முஸ்லிமின் மிகப்பெரிய அடையாளம் அவனது நற்குணமே. நபிகள் நாயகம் (ஸல்) அவர்களின் குணநலன்களைப் பற்றி அல்லாஹ் குர்ஆனில் சிலாகித்துக் கூறுகிறான்.
وَإِنَّكَ لَعَلَىٰ خُلُقٍ عَظِيمٍۢ
நீர் மகத்தான நற்குணம் கொண்டவராக இருக்கிறீர்! (68:4)
நபி (ஸல்) அவர்கள் கூறினார்கள்:
“உங்களில் சிறந்தவர் யாரெனில், உங்களில் நற்குணத்தால் சிறந்தவரே ஆவார்.” (புகாரி 3559)
உண்மை பேசுதல்
எந்தச் சூழ்நிலையிலும் பொய் பேசாமல் உண்மையே பேசுவது இஸ்லாத்தின் அடிப்படை ஒழுக்கமாகும். பொய் நயவஞ்சகத்தின் அடையாளமாகப் பார்க்கப்படுகிறது.
يَـٰٓأَيُّهَا ٱلَّذِينَ ءَامَنُوا۟ ٱتَّقُوا۟ ٱللَّهَ وَكُونُوا۟ مَعَ ٱلصَّـٰدِقِينَ
இறைநம்பிக்கை கொண்டோரே! நீங்கள் அல்லாஹ்வை அஞ்சிக் கொள்ளுங்கள்; உண்மையாளர்களுடன் ஆகி விடுங்கள்!(9:119)
நபி (ஸல்) அவர்கள் கூறினார்கள்:
*உண்மையே பேசுங்கள். நிச்சயம் உண்மை நன்மைக்கு வழிகாட்டும். நன்மை சொர்க்கத்திற்கு வழிகாட்டும்*… பொய்யை விட்டும் தவிர்ந்து கொள்ளுங்கள். நிச்சயம் பொய் தீமைக்கு வழிகாட்டும். தீமை நரகத்திற்கு வழிகாட்டும்.” (நூல்: புகாரி 6094)
*கோபத்தை அடக்குதல் மற்றும் மன்னித்தல்*
பிறர் செய்த தவறுகளை மன்னிப்பதும், கோபத்தை அடக்குவதும் இறைவனுக்கு மிகவும் பிடித்தமான செயல்களாகும்.
அவர்கள் வசதியிலும் வறுமையிலும் செலவிடுவார்கள்; *கோபத்தை அடக்கிக் கொள்வார்கள்*; மக்களை மன்னிப்பார்கள். நன்மை செய்வோரை அல்லாஹ் நேசிக்கிறான். (3:134)
நபி (ஸல்) அவர்கள் கூறினார்கள்:
இறைத்தூதர்(ஸல்) அவர்கள் கூறினார்கள்’
மக்களைத் தன்னுடைய பலத்தால் அதிகமாக அடித்து வீழ்த்துபவன் வீரன் அல்லன்; உண்மையில் வீரன் என்பவன், கோபத்தின்போது தன்னைக் கட்டுப்படுத்திக் கொள்பவனே ஆவான்.
என அபூ ஹுரைரா(ரலி) அறிவித்தார்.
(புகாரி: 6114
பணிவு மற்றும் பெருமையை விட்டும் விலகி இருத்தல்
இஸ்லாம் கர்வத்தையும், பெருமையையும் வன்மையாகக் கண்டிக்கிறது. நடை பாவனை முதல் பேச்சு வரை அனைத்திலும் பணிவு இருக்க வேண்டும் என்று அது கற்பிக்கிறது.
மக்களை விட்டும் உன் முகத்தை அகந்தையுடன் திருப்பிக் கொள்ளாதே! பூமியில் கர்வமாக நடக்காதே! அகந்தையும், கர்வமும் கொண்ட எவரையும் அல்லாஹ் நேசிப்பதில்லை. (அல்குர்ஆன் 31:18)
நபி (ஸல்) அவர்கள் கூறினார்கள்:
لاَ يَدْخُلُ الْجَنَّةَ مَنْ كَانَ فِي قَلْبِهِ مِثْقَالُ ذَرَّةٍ مِنْ كِبْرٍ ”
“எவடைய உள்ளத்தில் கடுகளவு பெருமை இருக்கிறதோ அவன் சொர்க்கத்தில் நுழைய மாட்டான்.” (நூல்: முஸ்லிம் 91)
வாக்குறுதியை நிறைவேற்றுதல்
கொடுத்த வாக்கைக் காப்பாற்றுவது ஒரு முஸ்லிமின் மிக முக்கிய அடையாளமாகும். வாக்குறுதியை மீறுவது நயவஞ்சகர்களின் பண்பாகக் கூறப்படுகிறது.
وَأَوْفُوا۟ بِٱلْعَهْدِ ۖ إِنَّ ٱلْعَهْدَ كَانَ مَسْـُٔولًۭا
“… வாக்குறுதியை நிறைவேற்றுங்கள்! வாக்குறுதி விசாரிக்கப்படக் கூடியதாகும். (அல்குர்ஆன் 17:34)
நபி (ஸல்) அவர்கள் கூறினார்கள்:
“நயவஞ்சகனின் அடையாளங்கள் மூன்றாகும்: பேசினால் பொய்யுரைப்பான்; வாக்களித்தால் மாறு செய்வான்; நம்பினால் துரோகம் செய்வான்.” (நூல்: புகாரி 33)
பெற்றோருக்கு நன்மை செய்தல்
அல்லாஹ்வை வணங்குவதற்கு அடுத்தபடியாக, பெற்றோருக்கு நன்மை செய்வதையே இஸ்லாம் வலியுறுத்துகிறது.
“தன்னைத் தவிர வேறு யாரையும் நீங்கள் வணங்கக்கூடாது என்றும், பெற்றோருக்கு நன்மை செய்ய வேண்டும் என்றும் உமது இறைவன் ஆணையிட்டுள்ளான் (அல்குர்ஆன் 17:23)
நபி (ஸல்) அவர்களிடம் “நற்செயல்களில் அல்லாஹ்வுக்கு மிக விருப்பமானது எது?” என்று கேட்கப்பட்டது. அதற்கு, “தொழுக்கையை அதற்குரிய நேரத்தில் தொழுவது” என்றார்கள். அடுத்து எது? என்று கேட்கப்பட்டபோது, “பெற்றோருக்கு நன்மை செய்வது” என்றார்கள்.
(நூல்: புகாரி 527)
இஸ்லாமியப் பார்வையில் ஒழுக்கம் என்பது மறுமை வெற்றியின் திறவுகோலாகும். மறுமை நாளில் நன்மை, தீமைகள் நிறுக்கப்படும் தராசில், நற்குணத்தை விட கனமான செயல் வேறொன்றும் இருக்காது என்று நபிமொழிகள் கூறுகின்றன.
நபி (ஸல்) அவர்கள் கூறினார்கள்:
“மறுமை நாளில் முஃமினுடைய தராசில் நற்குணத்தை விடக் கனமானது வேறெதுவும் இருக்காது.” (நூல்: திர்மிதி 2002)
எனவே, குர்ஆன் மற்றும் சுன்னாவின் வழியில் நமது குணங்களைச் சீர்படுத்தி வாழ்வதே சிறந்த வெற்றியாகும்.
About Author
